23
Sh, SH
2745 New Articles

Ademi jep sinjale jete për Vllazninë

SPORT
TIPOGRAFIA

Surprizon kryebashkiakja, e cila ka ndjekur të plotë ndeshjen dhe në fund të saj ka dhënë më shumë garanci financiare për kuqeblutë

Gaspër Marku

Miqësorja e djeshme kishte edhe një të veçante tjetër po aq të rëndësishme. Dhe kjo ka të bëjë me kryetaren e Bashkisë së Shkodrës, Voltana Ademi, e cila është shfaqur vetëm pak minuta përpara se futbollistët të dilnin në fushën e lojës për të nisur miqësoren Vllaznia-Tërbuni. Surpriza e saj nuk kishte të bënte vetëm me pjesëmarrjen në këtë ndeshje miqësore, por edhe me atë që ajo nuk ka preferuar të qëndrojë në tribunën VIP. E shoqëruar nga kryetari i Bordit Mbikqyrës Vllaznia, Shpëtim Quku, administratori Astrit Gjyrezi dhe drejtori sportiv Eugent Zeka, ao është zhvendosur në anën e pankinave, duke u sistemuar në pankinat e stadiumit, ku ka qëndruar për 90 minuta. Pas përfundimit të ndeshjes, ajo ka qëndruar përmbi 15 minuta në qendër të fushës duke diskutuar me stafin në fjalë, por këtë radhë duke pasur të pranishëm edhe teknikun Armando Cungu. Shihet qartë edhe në prononcimin e dhënë për mediet menjëherë pas takimit miqësor se ajo flet plot besim dhe optimizëm për veprimet e deritashme në skuadër, procesin stërvitor, merkaton e kryer deri tani përpjekjet që po bëhen për të marrë edhe emra të tjera cilësorë. Ndërkohë Ademi nuk ngurroi të ofrojë garancitë dhe siguritë e duhur për të ardhmen e skuadrës në drejtim të anës financiare duke dhënë edhe lajmin që skuadra udhëton të hënën jashtë vendit për fazën përgatitore. Por ajo lëshoi edhe një tjetër sinjal pozitiv për privatizimin e klubit.

E pranishme në ndeshjen miqësore çka do të thotë se ka një vëmendje nga ana e juaj ndaj skuadrës kuqeblu…

Vllaznia ka një vëmendje nga të gjithë, është një mbështetje i japim në emër të qytetit. Mendoj se Vllaznia ka nevojë sigurisht edhe për imazhin publik dhe mbështetjen publike e kërkojmë nga të gjithë mediet në këtë rast, sidomos të Shkodrës, për këndvështrimin pozitiv që duhet të ketë skuadra. Skuadra ka një fytyrë tjetër, është më e lidhur, po funksionon më shumë në grup, futet në fazë përgatitore më mirë se një vit më parë. Përsëri jemi në kërkim për lojtarë të tjerë, kemi bërë disa hapa përpara, vazhdojmë të kërkojmë. Besojmë se kemi bërë hapa pozitivë. Të paktën kjo konfirmohet nga stafi teknik në kontaktet e vazhdueshme që ne mbajmë me to.

Çfarë po bëhet për fazën përgatitore, a do ta ketë Vllaznia një të tillë për këtë pragkampionati?

Janë bërë përgatitjet, të hënën ekipi do të niset dhe do të ketë një fazë të plotë përgatitore. Sigurisht i paraprijmë kampionatit që fillon në dhjetëditëshin e parë të shtatorit, prandaj jemi në kohën e duhur dhe të kthehen në kohën e duhur. E kjo në mënyrë që të kapim kampionatin, ashtu sikurse kërkohet dhe në formën e duhur teknikisht.

Po me financat a ka lëvizje konkrete, sepse thuhet se është problem për momentin një gjë e tillë për ecurinë e skuadrës?

Aktualisht presim konfirmimin e prefektit të qarkut Shkodër dhe të vazhdojmë normalisht edhe ne me pagesat si gjithmonë. Vendimi për kalimin e fondeve për llogari të klubit Vllaznia është miratuar në Këshillin Bashkiak dhe brenda dhjetë ditëve prefekti duhet të shprehet. Deri më tani jemi në procedurë dhe sigurisht vazhdon puna si gjithmonë, nuk ka ndonjë gjë të veçantë.

Në lidhje me privatizimin?

Aktualisht kemi marrë një konsulencë të huaj. Në Shqipëri nuk ka, në asnjë rast nuk ka ndodhur një vlerësim i një shoqërie të tillë. Që do të thotë se në të gjitha kontaktet që ne kemi pasur, formale dhe informale me sipërmarrje vlerësuese, ato kanë kërkuar një asistence ndërkombëtare për të bërë të mundur vlerësimin. Kjo për të hartuar temat e referencës dhe pastaj për të shkuar drejt ankandit.